Numërimi i votave për deputetë, përplasje verbale mes vëzhguesve të LVV dhe LDK

Në Qendrën e Numërimit të votave për deputetë, më saktë në sallën 1 Tetori, vëzhguesit janë përplasur verbalisht për shpalljen ose jo të një vote të pavlefshme.

Bëhet fjalë për vëzhguesit nga Lëvizja Vetëvendosje dhe Lidhja Demokratike e Kosovës, të cilët patën mosmarrëveshje për votat, duke bërë kështu që të ndalet procesi i numërimit të votave për deputetë deri në 10 minuta.

Kjo nuk është hera e parë që vëzhguesit gjatë procesit të numërimit të votave përplasen. Kujtojmë që ditë më parë një përplasje fizike, ku ndërhyri edhe Policia ndodhi po prej vëzhgueseve të partive LVV dhe LDK.

Ndryshe, Komisioni Qendror i Zgjedhjeve, ditën e sotme doli me të dhëna të reja sa i përket procesit të numërimit të votave për kandidatët për deputet.

Sipas të dhënave të publikuara nga KQZ deri në përfundim të ditës së shtunë (15 shkurt 2025), janë numëruar 53.96% e vendvotimeve apo 1,367 nga gjithsej 2,533 vendvotime.