Disa të arrestuar në Podujevë e Fushë Kosovë për posedim të drogës dhe armëve

Në Podujevë dhe Fushë Kosovë janë arrestuar disa persona për posedim të paautorizuar të narkotikëve dhe armëmbajtje pa leje, gjatë kontrolleve të zhvilluara nga Policia e Kosovës.

Sipas raportit të policisë, në rrugën “Skënderbeu” në Podujevë, rreth orës 18:40, një person është kapur me një thikë dhe 0.83 gram substancë të dyshuar narkotike të llojit marihuanë.

I dyshuari është arrestuar dhe, pas intervistimit, është dërguar në mbajtje me vendim të prokurorit.

Në një rast tjetër në rrugën “Nëna Terezë” në Fushë Kosovë, rreth orës 21:30, gjatë kontrollit të një automjeti në të cilin ndodheshin dy të dyshuar meshkuj, policia gjeti dhe konfiskoi 26 gram kokainë, dy telefona celularë, para kesh dhe automjetin.

Gjithashtu, policia kontrolloi edhe shtëpitë e të dyshuarve, por nuk u gjetën sende të tjera të dyshimta.

Të dy të dyshuarit janë arrestuar dhe janë dërguar në mbajtje me vendim të prokurorit.

Rastet janë nën hetim për të sqaruar rrethanat e plota të përfshirjes së të dyshuarve.