50 mijë trupa ruse presin urdhrin për të sulmuar Kurskun, Scholz: Jam gati të takohem me Putin

Ukraina ka ngritur alarmin se në rajonin përreth Kurskut janë grumbulluar 50 mijë trupa në pritje të urdhrit për të sulmuar. Lajmi është bërë i ditur nga media amerikane “New York Times”, e cila citon zyrtarë ushtarakë amerikan dhe ukrainas.

Përveç ushtarëve rusë, gati për të sulmuar janë edhe njësitë e Koresë së Veriut. Pheniani ka dërguar mbi 10 mijë trupa në Rusi për të mbështetur Moskën në luftën e saj kundër Ukrainës. Sipas gjetjeve amerikane, këta ushtarë tani janë veshur me uniforma ruse dhe kanë marrë edhe armë dhe pajisje të përshtatshme nga pala ruse. Prandaj, koreano-veriorët mbeten në njësitë e tyre kombëtare. 

Komandanti i forcave të armatosura të Ukrainës, gjenerali Oleksandr Syrskyi, tha se ai udhëtoi në frontin në rajonin Kursk të Rusisë, duke parë nga afër situatën. “Forcat ruse po përpiqen të shpërndajnë trupat tona dhe të avancojnë thellë në territorin që ne kontrollojmë”, tha ai në Telegram. Disa analistë ushtarakë amerikanë kanë vënë në pikëpyetje arsyetimin e operacionit Kursk, i cili zgjeroi një vijë tashmë të gjatë të frontit, duke krijuar më shumë tendosje për Kievin.

Sakaq, Kancelari gjerman Olaf Scholz ka bërë të ditur se dëshiron të zhvillojë një takim me Presidenin e Rusisë, Vladimir Putin. “Po, kam vendosur të flas me Presidentin rus në kohën e duhur”, tha politikani i SPD në programin ARD “Caren Miosga”.

“Por unë jam një politikan i përgjegjshëm, nuk po e bëj këtë i vetëm”, shtoi ai.

Scholz foli për herë të fundit me Putinin me telefon në dhjetor 2022. Ai bëri thirrje për një zgjidhje diplomatike dhe tërheqjen e trupave ruse nga Ukraina. Në qershor, Scholz nuk donte të përjashtonte një bisedë me Putinin në të ardhmen, por tha në atë kohë se një bisedë kishte kuptim vetëm nëse kishte diçka konkrete për të diskutuar.

Moska, nga ana tjetër, deklaroi në fillim të tetorit se Putini ishte i hapur për dialog, edhe nëse marrëdhëniet midis Moskës dhe Berlinit ishin efektivisht në zero.