Gjykimi për vrasjen e Ivanoviqit drejt fundit, ish-hetuesi Basara ndryshon deklarimin

6 vjet pas vrasjes së ish-politikanit serb Oliver Ivanoviqit, e 4 vjet pas ngritjes së aktakuzës, procesi gjyqësor për këtë po shkon drejtë fundit.

Ndonëse jo kundër autorit të vrasjes, ky proces gjyqësorë u zhvilluar ndaj personave që dyshohet se vinin nga grupi kriminal që mori pjesë në organizimin e vrasjes së Oliver Ivanoviqit.

Në seancën e sotme, në Prishtinë ka përfunduar edhe mbrojtja e të akuzuarit të fundit, e që i hap rrugë fjalës përfundimtare e vendimit të trupit gjykues. Por ndonëse i akuzuari Rade Basara, në seancën e një dite më parë, ai vendosi të jepte mbrojtjen e tij, në seancën e sotme ndryshoi tërësisht qëndrim.

“Unë dje kam pasur probleme shëndetësorë shumë të mëdha, madje kam përfunduar në emergjencë, kam edhe raportin mjekësor dhe në të cilin thuhet se kisha probleme me tension te larte..mua më kanë sugjeruar edhe të qëndroj në spital, por kam refuzuar…dhe nga ky moment unë do të mbrohem ne heshtje sepse nuk jam në gjendje që ta përcjell këtë proces sepse kam probleme shëndetësore të mëdha”, ka thënë Basara.

Basara, që ka qenë hetues në Policinë e Kosovës, sipas provave të Prokurorisë kishte qenë  anëtar i grupit të organizuar kriminal të udhëhequr nga Milan Radoiçiq, tha se nuk qëndron as në deklarimin e bërë një ditë më parë.

Këto veprime u anuluan për shkak se avokati Dejan Vasiq, kishte dërguar zëvendësim një praktikant, e që nuk është e lejuar.

Vasiq u gjobit nga Gjykata me 350 euro gjobë për këtë.

Ndonëse i akuzuari Rade Basara insistonte se ndryshimi i qëndrimit të tij, është për arsye shëndetësore, prokurori special kërkoi që i njëjti të sqarohet nëse arsye e vërtetë është ndonjë kërcënim ndaj tij.

“Edhe pse është e pamohueshme mbrojtja në heshtje, por duke u nisur nga fakti se në të gjitha seancat ka qenë insistimi që të deklarohet, ne vetëm të kemi përgjigjen e tij a ka arsye tjera kjo mbrojtje në heshtje mos është kërcënim presion apo diçka”, ka thënë prokurori, Burim Qerkini.

““Për mua është më e rëndësishme që të jetoj edhe disa vite normale s’ka pasur asnjë presion, për mua kryesisht është gjendja ime shëndetësore”, ka shtuar Basara.

Përveç tij në heshtje, janë mbrojtur edhe të akuzuarit Marko Roshiq, Dragisha Markoviq dhe Zharko Jovanoviq, ndërkohë që Silvana Arsoviq e Nedelkjo Spasojeviq janë deklaruar.

Të njëjtit Prokuroria Speciale i ngarkon me vepra penale për “Pjesëmarrje dhe organizimi i grupit kriminal të organizuar”, “keqpërdorim të detyrës zyrtare”, “Zbulim të fshehtësisë zyrtare” e “armëmbajtje pa leje”. /TV Dukagjini/