Biden thotë se do të kishte një “armëpushim nesër” nëse Hamasi do të lironte pengjet e mbetura

Presidenti amerikan Joe Biden tha se do të kishte një “armëpushim nesër” nëse Hamasi do të lironte pengjet e mbajtura në Gaza.

“Siç e kam thënë, i takon Hamasit – nëse ata donin ta bënin, ne mund ta përfundonim nesër. Dhe armëpushimi do të fillonte nesër”, tha Biden në një mbledhje fondesh në Seattle të shtunën, sipas gazetarëve në dhomë.

Familjet e pesë amerikanëve që besohet se mbahen peng në Gaza u takuan të premten me këshilltarin e sigurisë kombëtare, Jake Sullivan dhe koordinatorin e Lindjes së Mesme, Brett McGurk.

Sipas një leximi të takimit nga përfaqësuesit e familjeve, ata i shprehën zhgënjimin e tyre të jashtëzakonshëm me një tjetër pauzë, tek zyrtarët e administratës Biden, raporton CNN.

Ekipet negociuese të Izraelit dhe Hamasit u larguan nga Kajro pa një marrëveshje në fillim të kësaj jave.

Militantët e Hamasit thanë se refuzimi i Izraelit i një plani armëpushimi të paraqitur nga ndërmjetësit në negociatat në Kajro i ktheu bisedimet për lirimin e pengjeve në “sheshin e parë”.

Hamasi akuzoi kryeministrin izraelit Benjamin Netanyahu se po pengon bisedimet e armëpushimit për të përdorur negociatat si mbulesë për të sulmuar qytetin jugor të Gazës, Rafah.

Izraeli ka refuzuar vazhdimisht të bie dakord për një armëpushim të përhershëm në Gaza derisa Hamasi të mposhtet, edhe nëse të gjithë pengjet lirohen.

Të martën, Netanyahu tha se “propozimi i Hamasit ishte shumë larg nga kërkesat thelbësore të Izraelit”.