Vetëvendosje zyrtarizon futjen në garë në zgjedhjet në Maqedoni të Veriut, garon me tre kandidatë për deputetë

Këshilltari i Albin Kurtit dhe kandidati për deputet në Maqedoninë e Veriut, Bekim Qoku ka bërë të ditur se Lëvizja Vetëvendosje do të ketë tre kandidatë për deputetë në zgjedhjet e 8 majit në Maqedoninë e Veriut.

Kandidatët do të jenë pjesë koalicionit VLEN.

“Lëvizja VETËVENDOSJE! do t’i ketë tre kandidatë për deputetë, me koalicionin VLEN. Ne do të jemi pjesë e fitores që VLEN!

Në Njësinë Zgjedhore 1, kandidate me numrin 6 në listë do të jetë znj. Nafie Selmani. Në Njësinë Zgjedhore 2, kandidate me numrin 6 në listë do të jetë znj. Medine Ukshini. Ndërsa në Njësinë Zgjedhore 6, kandidat me numrin 2 në listë do të jem unë, Bekim Qoku”, shkruan Qoku në profilin e tij Facebook.

Ai shton se në Maqedoninë e Veriut Lëvizja VETËVENDOSJE! ka shumë aktivistë dhe simpatizantë.

Në këtë mënyrë Lëvizja Vetëvendosje ka zyrtarizuar  përfshirjen në garën zgjedhore në Maqedoninë e Veriut. Kryeministri i Kosovës Albin Kurti, i cili është edhe kryetar i Lëvizjes Vetëvendosje, parti e cila është akuzuar për ndërhyrje në zgjedhjet në Maqedoninë e Veriut, kishte thënë se partia e tij nuk është e regjistruar si subjekt politik në RMV.

Ai gjithashtu kishte deklaruar se nuk do të marrin pjesë në zgjedhjet në Maqedoninë e Veriut.

Lëvizja e Kurtit, mori pjesë edhe në zgjedhjet në Shqipëri, më 25 prill 2021, por pa arritur ndonjë rezultat për t’u theksuar.