Në Prizren ndizen qirinjë për policin e rënë në krye të detyrës

Kryetari i Prizrenit, Shaqir Totaj, së bashku me zyrtarë komunalë dhe qytetarë, kanë shprehur solidaritetin e tyre, në lidhje me humbjen e jetës së policit, Afrim Bunjaku në një sulm të dhunshëm në Banjskë të Zveqanit që ndodhi dje në orët e hershme të mëngjesit

Kryetari i Prizrenit, Shaqir Totaj, së bashku me zyrtarë komunalë e qytetarë, në Stacionin Policor Alfa në Prizren, shprehën sonte solidaritetin me familjen dhe kolegët e rreshterit të ndjerë, Afrim Bunjaku, i cili humbi jetën dje në incidentin e dhunshëm në Banjskë të Zveqanit.

“Në një kohë kur Kosova po përjeton sfida të ndryshme, është e rëndësishme të jemi të bashkuar në ndërtimin e një shoqërie të sigurt dhe të drejtë. Kjo ngjarje e trishtë na bën të reflektojmë mbi rëndësinë e bashkëpunimit dhe koordinimit të të gjitha institucioneve për të siguruar që sundimi i ligjit të zbatohet në gjithë territorin e Kosovës. Shprehim ngushëllimet tona më të sinqerta familjarëve dhe kolegëve të policit të ndjerë me shpresën që drejtësia të vihet në vend sa më shpejtë. Lavdi!”, ka thënë Totaj në njoftimin e komunës.

Ndryshe, edhe mbrëmë janë bërë homazhe nga përfaqësues të institucioneve të Kosovës, ambasadori amerikan e policë të shumtë, para Stacionit Policor Qendër në Prishtinë, të cilët kanë bërë ndezjen e qirinjve për policin e rënë të dielën në krye të detyrës, Afrim Bunjaku në veri.