Atiq: Dhuna e sotme në Veri shfaq veprimet e kriminelëve serbë ndaj shqiptarëve për vite me radhë

Kryetari i Komunës së Mitrovicës së Veriut, Erden Atiq, ka thënë se dhuna që është parë në videot e publikuara të enjten ndaj dy shqiptarëve në veri, shpërfaqë veprimet e grupeve kriminale serbe që kanë ndodhur ndaj shqiptarëve për vite me radhë.

Atiqi ka thënë se veprime të tilla kriminale janë të papranueshme dhe të dënueshme.

“Akti i dhunës ndaj dy shqiptarëve në Mitrovicën e Veriut, i shfaqur tashmë edhe përmes videos, shpërfaqë veprimet e grupeve kriminale që kanë ndodhur ndaj shqiptarëve për vite me radhë. Qyteti ynë ju përket të gjithë qytetarëve dhe assesi bandave kriminale që tentojnë ta mbajnë dhunshëm kontrollin mbi të”, ka shkruar ai në Facebook.

Ndër të tjera, Atiqi ka kërkuar nga organet kompetente që ta zbardhin rastin dhe t’i sjellin kriminelët para drejtësisë.