“The Sun”: Katër britanikë në kërkim për vrasjen e biznesmenit në Shqipëri

Mediat britanike i bëjnë jehonë lajmit se katër britanikë janë përfshirë në një ekzekutim mafioz në Shqipëri.

Gazeta e madhe ‘The Sun’ shkruan se policët kanë nisur ‘gjuetinë’ për katër britanikë, të përfshirë në ekzekutimin e një biznesmeni shqiptar.

“Policia ndërkombëtare është në ndjekje të katër britanikëve për vdekjen e një biznesmeni shqiptar, i cili u qëllua me armë në kafenenë e tij. Grupi prej tre burrash dhe një grua janë në kërkim pas atentatit ndaj Ardian Nikulaj,” shkruan gazeta.

Sipas saj, britanikët janë arratisur nga Shqipëria për një destinacion të panjohur.

Ajo thekson se në kërkim për vrasjen është edhe një shtetas portugez, teksa shton se ai mund të jetë larguar drejt Maqedonisë së Veriut.

Gazeta shton se pamjet e kamerave të sigurisë tregojnë momentin e ekzekutimit. Teksa sjell këto pamje, gazeta shkruan se Ardian Nikulaj ishte kandidat i Partisë Socialdemokrate. Ai u qëllua shtatë herë me pistoletë.