Rama akuzon Muratin: Po na i bllokon 28.8 milionë euro, do i drejtohemi Kushtetueses nëse s’barten menjëherë

Kryetari i Komunës së Prishtinës, Përparim Rama, ka hedhur akuza ndaj Ministrit të Financave, Hekuran Murati duke thënë se po bllokon bartjen e të hyrave vetanake të komunave nga vitet paraprake, shkruan GazetaDemos.

Rama ka bërë të ditur se janë 28.8 milionë euro të parapara për 172 projekte kapitale të Kryeqytetit për këtë vit të cilat Qeveria po ua bllokon.

Rama përmes këtij postimi publik ka kërkuar nga Ministri i Financave, Hekuran Murati, që urgjentisht të bëjë bartjen e të hyrave vetanake të Prishtinës dhe të komunave, në të kundërtën ka thënë se do t’i drejtohen Gjykatës Kushtetuese.

“Nëse këto mjete nuk barten menjëherë, do të konsiderojmë se ky është një veprim i qëllimshëm i Qeverisë për të bllokuar zhvillimin e Kryeqytetit. Prandaj, si palë e autorizuar, ne do të detyrohemi t’i drejtohemi Gjykatës Kushtetuese në mbrojtje të të drejtave të qytetarëve të Prishtinës”, ka shkruar Rama./Demos/