Të pakënaqur me pagat, sindikalistët e Gjykatës Themelore paralajmërojnë grevë

Shoqata Sindikale e Administratës së Gjykatës Themelore në Prishtinë është shprehur e pakënaqur me pagat.

 Për një gjë të tillë Shoqata Sindikate ka kërcënuar edhe me grevë transmeton GazetaDemos.

Kjo shoqatë përmes një komunikate për media ka njoftuar se për këtë çështje iu ka drejtuar Këshillit Gjyqësor të Kosovës dhe ministrisë së Punëve të Brendshme, duke kërkuar paga të dinjitetshme dhe kushte më të mira në punë, në të kundërtën kanë paralajmëruar se do ta aktivizojnë grevën e pezulluar më 18 mars 2022.

“1- Këshillit Gjyqësor të Kosovës (KGJK-së) me kërkesë që Vendimi për klasifikimin e vendeve të punës për të punësuarit në gjyqësor nr.01/2023 dt. 18.01.2023 ta zbatoj pasi i njëjti është i bazuar në Kushtetutën e Republikës së Kosovës, në Ligjin mbi Këshillin Gjyqësor të Kosovës dhe në Ligjin për Paga në Sektorin Publik.

2- Ministrisë së Punëve të Brendshme – hartues i Ligjit për Paga në Sektorin Publik ti korrigjoj listat e pagave të muajit Shkurt pasi shumë pozita të stafit të administratës së gjykatave dhe prokurorive kanë pësuar degradim në pozita për koeficient dhe ulje page, dhe në pagat për muajin Mars ta zbatoj Vendimin e KGJK-së dt.18.01.2023 pasi është në diskrecion të KGJK-së që pozitat e gjithë të punësuarve ti klasifikoj sipas vendeve të punës duke mos dalur nga korniza e koeficienteve të përcaktuar nga ana Qeverisë së Republikës respektivisht Ministrisë së Punëve të Brendshme si hartuese dhe sponsorizuese e Ligjit pë Paga në Sektorin Publik”, thuhet në njoftimin e Sindikatës.

Sipas sindikatës së Administratës në Gjykatën Themelore në Prishtinë, moszbatimi i vendimit të lartshënuar nga institucionet relevante dhe injorimi i kërkesave të stafit të administratave të gjykatave dhe prokurorive për një pagë të dinjitetshme dhe kushte më të mira të punës- do t’i detyroj, siç janë shprehur, padëshirën e tyre ta aktivizojnë grevën e pezulluar me datën 18.03.2022./Demos/