Komandanti i KFOR-it: I bëra të qartë Beogradit se i kemi numrat e mjaftueshëm për t’u kujdesur për sigurinë

Komandanti i KFOR-it, Angelo Ristuccia, në një intervistë ekskluzive për Klan Kosova, ka thënë se ia ka bërë të qartë Beogradit se kanë personel të mjaftueshëm për të garantuar sigurinë dhe lirinë e lëvizjes në mbarë Kosovën. Sa i përket FSK-së, Ristuccia tha se ata mund të lëvizin në veri të vendit vetëm pas miratimit të komandantit të KFOR-it. Lidhur me zhvillimet e fundit, ai deklaroi se dëshiron t’ua bëjë të qartë të gjithëve se forcat paqeruajtëse janë të vetëdijshme për atë që po ndodh në terren.

“Siç e thash qartë ua kam bërë me dije që jemi plotësisht të pajisur, kemi numra të mjaftueshëm, dhe të organizuar për t’u kujdesur për sigurinë dhe lirinë e lëvizjes në tërë territorin e Kosovës”, ka thënë Ristuccia.

Ai tha se duke pasur inteligjencën e NATO-s, 27 aleatëve dhe 7 vendeve partnere, KFOR-i ka kapacitet të mjaftueshëm për të kuptuar se çfarë po ndodh në terren.

“Është detyra jonë profesionale si dhe morale që plotësisht të kuptojmë situatën t’ia japim sëcilit fenomen dimensionin e duhur që ka dhe me lejoni të sigurojë të gjithë popullatën në Kosovë që ne kemi një kuptim të qartë të asaj se çfarë ndodhë në terren. Do të doja t’ua rikujtoja të gjithëve që ne kemi në terren inteligjencen e NATO-s, kemi 27 vende, 27 aleatë të NATO-s dhe 7 vende partnere të cilat janë plotësisht të zotuara që të na mbështesin. Pra kemi një pasqyrë të qartë se çfarë po ndodhë”, deklaroi ai.

Ristuccia ka folur edhe për lëvizjen e FSK-së në veri, gjë që sipas tij mund të bëhet vetëm me miratimin e komandantit të KFOR-it.

“FSK-ja mund të zhvendoset në veri me pëlqimin e komandantit të KFOR-it, ne plotësisht respektojmë nivelet e trajnimit dhe çfarë mund të bëjnë në fushën e shpëtimit në katastrofa me mjete të pashpërthyera dhe ato që kanë të bëjnë më hulumtim e shpëtim”, tha ai.

“Më lejoni ta them shumë qartë se ka një marrëveshje ndërmjet institucioneve të Kosovës e KFOR-it dhe NATO-s, që zhvendosja e FSK-së në veri ka nevojë për pëlqimin e komandantit të KFOR-it”, pohoi ai.