Nura pas takimit me Osmanin: Biseduam për procesin e vlerësimit dhe kompensimit të dëmeve materiale

Kryetari i Komunës së Skenderaj, Fadil Nura ka pritur në takim Presidenten e Kosovës, Vjosa Osmani, me të cilët kanë biseduar për vërshimet në këtë komunë.

Nura ka shkruar se me Osmanin kanë biseduar edhe për nevojën e menjëhershme për të filluar procesin e vlerësimit dhe kompensimit të dëmeve materiale.

“Sot prita në zyrë këtë pasdite Presidenten e Republikës së Kosovës, znj.Vjosa Osmani – Sadriu, me të cilën diskutuam për situatën në të cilën ndodhemi si komunë, pas përmbytjeve të mëdha dhe dëmeve të konsiderueshme, si dhe për nevojën e menjëhershme për të filluar procesin e vlerësimit dhe kompensimit të dëmeve materiale. Është e kuptueshme që situata kërkon reagim të shpejtë nga të gjitha institucionet e nivelit qeveritar dhe agjencive tjera, që t’u dalim në ndihmë familjeve të prekura. Për vizitë kanë qenë sot edhe ministrat znj.Rozeta Hajdari, z.Armend Meha dhe z.Elbert Krasniqi, të cilët janë solidarizuar me situatën emergjente në terren sidomos me bizneset që kanë pësuar nga kjo situatë.”, thuhet në njoftim.