Misini: Personat me aftësi të kufizuara po përballen më vështirësi të mëdha

Zyrtarja për komunikim nga HANDIKOS, Kaltrina Misini thotë se viti 2022 është shpallur si vit i personave me aftësi të kufizuara në Kosovë dhe e pritshme ka qenë që të ketë ndonjë përmirësim të dukshëm të situatës, por që sipas saj jo gjithçka mund të bëhet brenda një viti.

“Viti 2022, siç dihet është shpallur si vit i personave me aftësi të kufizuara në Kosovë dhe e pritshme ka qenë që të ketë ndonjë përmirësim të dukshëm të situatës, ndonëse jo gjithçka mund të bëhet brenda një viti. Mirëpo për këtë, më 3 dhjetor do shpaloset një raport nga kalendari vjetor në një konferencë që do të mbahet në Qeverinë e Kosovës, ku do shihet se sa janë implementuar aktivitetet apo intervenimet në shumë fusha, të marra përsipër nga ministritë përkatëse të Qeverisë së Kosovës”.

Misini ka treguar për vështirësitë me te cilat hasin personat me aftësi të kufizuara.

“Përkundër kalimit të viteve, personat me aftësi të kufizuara në Kosovë vazhdojnë të hasin në vështirësi të mëdha në shumë fusha të jetës së përditshme, nisur nga qasja, që përkundër përpjekjeve të institucioneve, vazhdojnë të kenë barriera në rrugë e institucione, përfshi edhe në ato institucione ku duhet të marrin shërbime esenciale”, tha ajo për Front Online.

“Pastaj ende ka sfida në punësim, në legjislacion etj. E kohëve të fundit si problematikë është bërë edhe vlerësimi jo i drejtë nga komisionet të personave me status paraplegjikë dhe tetraplegjikë, gjë që po i lë jashtë skemës së pensioneve” ka theksuar ajo.