“Serbia të përgatitet për vendime të vështira”, publikohet letra që Macron dhe Scholz i dërguan Vuçiqit

Presidenti francez Emmanuel Macron dhe kancelari gjerman Olaf Scholz i kanë dërguar një letër të përbashkët presidentit serb Aleksandar Vuçiq, rreth marrëdhënieve me Kosovën.

Në letër, kreut të shtetit serb i bëhet thirrje të tregojë “vendosmërinë dhe gatishmërinë maksimale” për të marrë vendime të vështira, “të cilat çojnë në përparim në dialogun ndërmjet Kosovës dhe Serbisë nën kujdesin e BE-së”.

Dy liderët sqarojnë dhe vëmendjen e madhe karshi Ballkanit Perëndimor.

“Ne po ju dërgojmë këtë letër të përbashkët në një moment me rëndësi vendimtare për sigurinë në kontinentin evropian dhe stabilitetin në rajonin e Ballkanit Perëndimor. Jemi të bindur se, në dritën e agresionit rus kundër Ukrainës, duhet të bëjmë përpjekje edhe më të forta, në mënyrë që perspektiva evropiane e vendeve të Ballkanit Perëndimor të bëhet realitet dhe të zgjidhen mosmarrëveshjet afatgjata dypalëshe dhe rajonale. Normalizimi i plotë i marrëdhënieve ndërmjet Kosovës dhe Serbisë është thelbësor për Ballkanin Perëndimor”, thuhet mes tjerash në letër.

Tutje në letër thuhet se tensionet e fundit kanë treguar nevojiten urgjentisht hapa konstruktiv, si në planin praktik ashtu edhe në atë politik

“Ju drejtohemi juve si lider i vendit tuaj, për t’ju apeluar që të tregoni vendosmëri dhe gatishmëri maksimale për të marrë vendime të vështira, të cilat çojnë në përparim në dialogun ndërmjet Kosovës dhe Serbisë, nën drejtimin e BE-së. Tensionet e fundit kanë treguar se hapa konstruktivë përpara nevojiten urgjentisht, si në planin praktik ashtu edhe në atë politik”, thuhet në letrën e Macron dhe Scholz.