Art Rushiti dhe “Antonella” e serialit Patito Feo sjellin këngë së bashku, artisti shqiptar tregon si erdhi deri tek bashkëpunimi

Këngëtari shqiptar Art Rushiti së fundmi ka publikuar këngën e tij të re “Buenos Aires”, në bashkëpunim me artisten argjentinase Brenda Asnicar, e njohur si “Antonella” në serialin “Patito Feo”, shkruan GazetaDemos.

Kënga u publikua të premten dhe brenda pak kohësh arriti të mbledhë më shumë se një milion klikime në YouTube, derisa u pëlqye dhe u komentua shumë nga të rinjët shqiptarë dhe më tej.

“Buenos Aires” ishte paralajmëruar kohë më parë dhe pritej me entuziazëm, mirëpo të çuditur se si erdhi ky bashkëpunim, kanë mbetur shumë adhurues të Asnicar, të cilët e kanë ndjekur për vite me rradhë në rolin e Antonelës.

Art Rushiti tregon për Gazetën Demos detajet rreth këtij bashkëpunimi.

“Kanga ka ardhë shumë spontanisht. Unë Brenden e kam mike prej 3 vitesh, gjithmonë i kam folë për shtetin tonë edhe ajo na ka njoft dmth qe ka fansa edhe këtu. Pas publikimit të këngës Joanna, ajo më kontaktoi dhe kemi bisedu për projektet e tona, gjatë bisedës për shkak të energjisë së mirë edhe gjërave të përbashkta, lindi ideja për bashkëpunim”, tha ai.

Tutje këngëtari shqiptar tha se kjo këngë është një dhuratë për të gjithë fansat shqiptarë të artistes argjentinase, e cila me rolin e saj si “Antonella” u pëlqye shumë nga të rinjët që e kanë ndjekur serialin “Patito Feo”.

“Brenda ka dashur t’ju bëj një dhuratë fansave shqiptarë përmes një kënge në gjuhën shqipe dhe më ka zgjedhur mua për këtë bashkëpunim, pasi e ka ditë se sa shumë e duan shqiptarët e Kosovës dhe Shqipërisë”, u shpreh Rushiti për Gazetën Demos.

Mes tjerash ai bëri të ditur se së bashku me këngëtaren nga Argjentina janë duke planifikuar diçka akoma më të madhe.

Përveç këngës “Buenos Aires”, artisti shqiptar numëron edhe disa këngë tjera si “Apet”, “Mëkate” e “Joanna”.

Dashurinë për muzikën dhe talentin Rushiti e kishte shfaqur qysh në fëmijëri, duke qenë pjesë e shumë programeve shkollore me paraqitje skenike muzikore.

Ai cilësohet si artisti i vetëm shqiptar që u postua dy herë në faqen zyrtare të ikonës së muzikës Beyoncé, e cila iu referua me fjalët “Ti je në zemrën time”.