Hakerët ia ‘fshijnë’ llogarinë në Facebook deputetit Jahja Kokaj, i kërkojnë para për mos t’ia publikuar të dhënat

Humbja e llogarisë në rrjete sociale, shpesh herë mund të jetë vetëm një klik larg. Kjo pasi që shumë përdorues marrin mesazhe në ‘inbox’, të cilat në shikim të parë duken linqe krejt normale, por që klikimi i tyre mund të shkaktojë telashe të mëdha dhe persona të paautorizuar mund të kenë qasje në llogaritë private të personave të zakonshëm.

Pre e një mashtrimi të tillë ka rënë edhe deputeti i Kuvendit të Republikës së Kosovës nga radhët e Lëvizjes Vetëvendosje, Jahja Kokaj, i cili që nga mesdita e së premtes nuk ka qasje në llogarinë e tij në rrjetin social Facebook.

Kokaj ka denoncuar rastin në Policinë e Kosovës, ku ka deklaruar se ka pranuar mesazhe në ‘Messenger’ në formë linku, hapja e të cilave i kushtoi me humbjen e qasjes në profilin e tij. Ai po ashtu ka bërë të ditur se personat që kanë marrë në dorë llogarinë e Facebook-ut, u kanë dërguar mesazhet e njëjta edhe miqve të Kokajt.

Pas mesazheve që mori, Kokaj pranoi edhe një thirrje telefonike nga një numër me prefiks të shtetit të Suedisë, ku një person i paidentifikuar ka komunikuar në gjuhën angleze dhe i ka bërë të ditur deputetit të VV-së që tashmë ai e ka në duar profilin e tij dhe e ka shantazhuar në mënyrë që mos t’ia publikojë të dhënat e tij personale, bëjnë të ditur burimet e Sinjalit.

Personi i panjohur ka kërkuar nga deputeti Kokaj që t’ia dërgojë 100 dollarë amerikanë në formë të kriptovalutës në Monako, ndërkohë që nuk ka dhënë asnjë të dhënë lidhur me identitetin e tij.

Ndërkohë Prokuroria Themelore në Prishtinë ka nisur hetimet dhe rastin e ka cilësuar si ‘Shantazh’ dhe ‘Hyrje në sisteme kompjuterike’.