Rama i thotë Zelenskyt se Ballkani Perëndimor do të rindërtojë banesa në Irpin

“Vendet e Ballkanit Perëndimor do të rindërtojnë banesat në Irpin”.

Kështu është shprehur Kryeministri i Shqipërisë Edi Rama në një konferencë shtypi të mërkurën në Kiev, raporton agjencia ukrainase e lajmeve Interfax.

“Ne e pamë Irpin, Borodianka me sytë tanë. Më vjen mirë që pranuat propozimin tonë për të bashkuar përpjekjet tona dhe për të ndërtuar një lagje ose shtëpi të ndara në Irpin nga vendet tona”, tha ai duke iu drejtuar presidentit ukrainas Volodymyr Zelensky.

Më tej, kreu i qeverisë shqiptare shtoi se “duam ta bëjmë këtë në një mënyrë ballkanike, pa burokraci të panevojshme”.

Nga ana tjetër, Kryeministri i Malit të Zi, Dritan Abazoviç tha se kishte rreth 10 mijë refugjatë ukrainas në Mal të Zi, duke shtuar se vendi i tij ndjehej sikur “po priste njerëz vendas”.

“Ju keni miq. Na besoni, ne kemi pasur përvojë të ngjashme 30 vjet më parë. Ne e dimë se çfarë është lufta, agresioni dhe krimet e luftës”.