Dalin detaje nga telefonata që presidenti rus kishte me Macron: Putin do t’i arrijë qëllimet e veta përmes ‘negociatave ose luftës

Sot gjatë ditës ishte raportuar se Putin dhe Emmanuel Macron i Francës kishin folur me telefon për gati dy orë – tani janë zbuluar detaje të asaj që u tha nga Parisi dhe Moska, shkruan BBC. 

Përfaqësues nga zyra presidenciale e Macron në Francë, Elyséee, thanë se Macron i kishte kërkuar Putinit që t’i jepte fund sulmit rus dhe të garantonte sigurinë e vendeve bërthamore të Ukrainës pasi granatimet shkaktuan një zjarr në centralin bërthamor në Zaporizhzhia. Ndërkohë, raportohet se Putini i tha Macronit se Rusia nuk kërkon të sulmojë centralet bërthamore.

Putin i tha gjithashtu Macronit se Rusia do t’i arrijë qëllimet e saj përmes “negociatave ose luftës”, tha presidenca franceze.

Ndërkohë, në deklaratën e Kremlinit thuhet se Putin fajëson ukrainasit për incidentin e centralit bërthamor. Ai i tha Macronit se kishte qenë një “provokim” i organizuar nga “radikalët ukrainas”. Kremlini shtoi se personeli rus dhe ukrainas po ruanin bashkërisht vendin dhe se nivelet e rrezatimit ishin “normale”.

Putin tha gjithashtu se përpjekjet e së shtunës për të evakuuar civilët nga qytetet jugore të Mariupol dhe Volnovakha kishin dështuar sepse “nacionalistët ukrainas” refuzuan t’i linin njerëzit të largoheshin dhe përdorën armëpushimet e përkohshme vetëm për t’u përforcuar më tepër.

Ukraina tha se bombardimet ruse kishin vazhduar gjatë armëpushimeve të shtunën dhe të dielën. Më herët gjatë ditës së sotme, Kryqi i Kuq tha se të dy palët nuk kishin arritur të bien dakord për detajet se si do të funksiononin evakuimet.