Përkundër ngërçit politik, LDK nis punën për zgjedhjet lokale: Sot nisim dikutimet e brendshme për kadidatë

Kryetari i Lidhjes Demokratike të Kosovës, Lumir Abdixhiku ka treguar se ka nisur punën bashkë me partinë për përgatitjet e zgjedhjeve lokale, përkundër ngërçit politik.

Teksa tha se propozimi i tij për Qeveri Nacionale të Tranzicionit si “zgjidhje” mbetet kurdo që janë të gatshëm të tjerët, shtoi se s’ka më kohë për të humbur.

“Kohë për të humbur më nuk kemi. Zgjidhje dhamë; zgjidhja jonë aty mbetet – kurdo që janë të gatshëm të tjerët. Deri atëherë, përtej gjithë bllokadës që na shërbehet pa vizion, përtej mbledhive repetitive 48 orëshe pa ndonjë qëllim, LDK do të merret me proceset e veta përpara, aty ku s’mund të na kurthojnë. Do të merret me Zgjedhjet Lokale”.

“Prandaj, sot kam thirrur në takim të gjithë kryetarët e degëve të LDK-së, për të nisur procesin konsultativ e përgatitor mbi Zgjedhjet Lokale 2025 që do të mbahen këtë vjeshtë. Si fituese e zgjedhjeve të fundit lokale, me 9 komuna në qeverisje dhe me 206 këshilltarë lokal, po himë në këtë proces me plot vullnet e me plot bindje. Po himë dhe me plot përgatitje. Plot 6 muaj kohë. Prandaj, nga sot nisim konsultimet e brendshme për kandidatët për Kryetarë të Komunave e për këshilltarë lokal. Për nominimin e njerëzve me integritet e vullnet për të shërbyer në secilin qytet. Të gjithë ata që duan të përfaqësojnë vizionin tonë politik, vlerat tona, programet tona; të gjithë ata që duan t’i përfaqësojnë qytetarët tanë – i ftoj të bëhen pjesë e këtij procesi. LDK i ka dyertë e hapura për secilin. LDK mbetet e juaja. LDK mbetet dashni!”, tha ai.