“53-milionëshi”, ish-ministri: Nëse s’do paguheshin këto 53 milionë, Kosova do humbte 200-300 milionë euro

Në rastin e njohur si “Rasti i 53 milionë eurove”, ku ish-ministri i Infrastrukturës Pal Lekaj, Eset Berisha, këshilltar i lartë politik i tij, Nebih Shatri, ish-sekretar i Përgjithshëm në Ministrinë e Infrastrukturës (MI) dhe Besim Tahiri, drejtor i Prokurimit Publik në MI, po akuzohen për keqpërdorim të detyrës zyrtare, dëshmitari Bajram Hasani, ish-ministri i Tregtisë dhe Industrisë, ka deklaruar se nëse nuk do paguheshin këto 53 milion, më vonë Kosova do të duhej të paguante 200 deri në 300 milionë euro.

Këtë deklarim, ish-ministri i Tregtisë dhe Industrisë e ka dhënë në cilësi të dëshmitarit duke u përgjigjur në pyetjet e prokurorit special Atdhe Dema, raporton “Betimi për Drejtësi”, transmeton GazetaDemos.

“Sa më kujtohet i kemi mbajt 2-3 takime në Zyre të Kryeministrit si Komitet Ndërministror dhe aty është debatu gjatë, rreth dhënies apo pagesës së 53 milionë eurove”, ka thënë Hasani.

Ai tha se në atë komitet ka kërkuar nga ministri i linjës kryesuese atë kohë nga Pal Lekaj, që të gjitha propozimet apo arsyetimet që po i bënë në komitet, të vendosen me shkrim në letër, si dhe personalisht ka kërkuar që të sigurohet një opinion ligjor se a është në përputhje me ligjin ekzekutimi i atyre mjeteve.

“Edhe ta them që ky komitet sa më kujtohet kemi pas kompetenca ekzekutive për me vendos rreth kësaj pagese edhe kom kërku personalisht që të ndërrohet vendimi, që vendimi të shkoj si propozim në Qeveri, të merr vendim një organ më i lartë se ne, siç është Qeveria”, ka shtuar tutje Hasani.

Tutje, ai tha se ka vlerësuar se si anëtar i Komitetit Ndërministror nëse nuk realizohet kjo pagesë çështja do të shkoj në arbitrazh, pasi që sipas tij, janë konsultuar edhe me jurista brenda ministrisë dhe jashtë saj.

Po ashtu, ai tha se iu është thënë edhe nga drejtori i “Bechtel&Enka” që i njëjti do ta bllokonte autostradën “Arbën Xhaferi” për 10 vite, derisa të zgjidhej kjo çështje në arbitrazh.

“Ky problem gjithherë ka qenë i trashëgum prej qeverive të kalume, qeveria e kalume nuk i ka realizu pagesat me kohë”, ka shtuar tutje Hasani.

Ndërkaq, në lidhje me pyetjen e prokurorit Dema se a ka kërkuar shpjegim konkret me shkrim nga  “Bechtel&Enka” apo komunikimi ka qenë thjeshtë verbal, ai tha se “Bechtel&Enka” ka ardhur e pajisur me kërkesat e veta, si dhe nuk e ka llogaritur në këtë çmim disa gjëra edhe pse sipas tij, kishin pasur bazë ligjore.

Por, shtoi se frika e tij ka qenë se si ata si Qeveri e Kosovës po e analizojnë këtë çështje.

Ndër të tjera, dëshmitari Hasani ka deklaruar se qëndron prapa deklaratave të dhëna në polici dhe prokurori.

Kurse krejt në fund, dëshmitari Bajrami është përgjigjur në pyetjet e trupit gjykues të udhëhequr nga gjykatësja Violeta Namani.

Në lidhje me opinionin ligjor ai tha se nuk e ka parë të njëjtin dhe nuk ia din përmbajtjen, duke shtuar se ai opinion mund të jetë edhe negativ, e që theksoi se ka menduar se kur jepet opinioni ligjor është gjithçka në rregull.

Në fund të kësaj seance, Hasani ka pohuar se ka votuar pro rekomandimit duke u bazuar në mirëbesimin e kryeministrit atë kohë Ramush Haradinaj, duke shtuar se i ka besuar fjalës së tij se janë plotësuar kushtet.

Ndryshe, në fillim të seancës trupi gjykues ka refuzuar propozimin e të akuzuarit Berisha për mos dëgjimin e dëshmitarit Hasani në këtë seancë, pasi që nevojitet si provë konkrete e domosdoshme për mbrojtjen e cila ka të bëjë me ekstraktin e procesverbalit të 1 qershorit të vitit 2018, të KDN-së.

Për të cilin tha se nuk është propozuar si provë nga Prokuroria Speciale, ku sipas tij, dëshmohet se takimi i 1 qershorit 2018 ishte vazhdimësi e takimit të 31 majit 2018, për të cilën tha se vërtetonte se anëtarët e Komitetit drejtues ishin pajisur me të gjitha materialet e nevojshme, e në mesin e tyre edhe opinioni ligjor të Ministrisë së Infrastrukturës, i cili ishte kërkuar në takimin e 31 majit 2018.

Ndërkaq, mbrojtësi i tij, avokati Afrim Salihu tha se nga deklaratat e të mbrojturit të tij janë shkelur dispozitat e ligjit penal, pasi që sipas tij prokuroria përpos që ka obligim ligjor t’i bashkangjes provat fajësuese, nuk i ka bashkangjitur edhe ato shfajësuese, duke shtuar se ky procesverbal është esencial.

Në anën tjetër, prokurori Dema tha se ky propozim ishte i pakuptueshëm, i pa logjikshëm dhe i pas afatshëm, pasi që sipas tij, nuk mund të japin diçka që  nuk e posedojnë as vet.

Ky rast pritet të vazhdojë me seancat e para planifikuara dhe atë, më 15 dhe 16 maj 2023.

Ndryshe, edhe në seancën fillestare të mbajtur më 4 maj 2022, Lekaj dhe të tjerët ishin deklaruar të pafajshëm për veprën penale që iu vihet në barrë.

Prokuroria Speciale e Republikës së Kosovës (PSRK) më 4 shkurt 2022, ngriti aktakuzë ndaj Pal Lekajt, Eset Berishës dhe Nebih Shatrit.

Ndërsa, më 19 shkurt 2022, PSRK njoftoi se lidhur me këtë rast, më 18 shkurt është ngritur aktakuzë edhe ndaj Besim Tahirit.

Sipas aktakuzës së ngritur më 4 shkurt 2022 nga Prokuroria Speciale e Republikës së Kosovës, Pal Lekaj, në cilësinë e ministrit të Ministrisë së Infrastrukturës (MI), Eset Berisha, këshilltar i lartë politik i tij, Nebih Shatri, si sekretar  i Përgjithshëm në këtë ministri, në bashkëveprim dhe me dashje edhe me të pandehurin Besim Tahiri,  drejtor i Prokurimit Publik në MI, akuzohen për keqpërdorim të detyrës zyrtare. /Demos/