21-vjeçarit në Prishtinë i gjenden fishek e thikë në xhepa

Posedimi i armëve ilegale është një dukuri shqetësuese në vendin tonë, pasi që Policia vazhdimisht has në persona të armatosur të cilët cenojnë sigurinë e qytetarëve dhe rrezikojnë jetën e tyre. Ata shpesh kapen në flagrancë me armët, me të cilat sillen lirshëm.

Një rast i tillë është zbuluar së fundmi në rrugën “Bill Clinton” në Prishtinë, teksa Policia po patrullonte dhe ndaloi për kontroll një person.

Sinjali mëson se gjatë kontrollit policor, Policia ka gjetur një fishekë dhe një armë të ftohtë (thikë) – që i dyshuari 21-vjeçar i mbante pa autorizim.

Për pasojë, i dyshuari është shoqëruar në stacion policor, ku është intervistuar nga hetuesit policorë lidhur me rastin.

Pas përfundimit të procedurave policore, Prokurori i Shtetit ka urdhëruar ndalimin e të dyshuarit dhe inicimin e rastit nën dyshimet për kryerjen e veprës penale ‘Mbajtje në pronësi, kontroll ose posedim të paautorizuar të armës’.

Ndryshe, sipas Kodit Penal të Republikës së Kosovës kushdo që mban në pronësi, kontrollon ose posedon armë në kundërshtim me ligjin e zbatueshëm lidhur me armë të tilla, dënohet me gjobë deri në 7.500 euro ose me burgim deri në 5 vjet.