17 vjet Kushtetutë, a reagoi Kurti për dokumentin themeltar të shtetit

Sot Kosova shënon 17-vjetorin e miratimit të Kushtetutës – akti themeltar që përbën bazamentin e rendit juridik, shoqëror dhe institucional të shtetit të Kosovës. Përvjetori i dokumentit më të lartë juridik, të cilin profesori i së drejtës ndërkombëtare Enver Hasani e cilësoi si “pëngesë kundër çdo prirjeje jodemokratike”, u shoqërua me heshtje nga udhëheqja shtetërore.

Në një ditë që për një shoqëri demokratike do të duhej të ishte kremte e përkushtimit ndaj sundimit të ligjit, lideri në detyrë i qeverisë, Albin Kurti, nuk e pa të udhës të artikulonte qoftë edhe një reflektim simbolik mbi rëndësinë e Kushtetutës.

Gjykata Kushtetuese, që për çdo demokraci është gardiane e rendit dhe mbrojtëse e të drejtave të njeriut, u shënjestrua publikisht në diskursin politik si një pengesë ndaj “vullnetit të popullit”, një nocion që Kurti dhe vartësit e tij shpesh e ka përdorur si kartë për të relativizuar gjithçka – përfshirë edhe vetë Kushtetutën.

Kurti e cilësonte Gjykatën Kushtetuese si një “opozitë politike”, ndërsa e akuzonte se vendimet e saj nuk burojnë nga “motivi i ruajtjes se kushtetueshmërisë”. “Unë nuk jam i bindur që [rrëzimet e ligjeve] bëhen nga motivi i ruajtjes se kushtetueshmërisë sa i nga një opozitarizmi politik.” – deklaronte Kurti.

Një numër i konsiderueshëm ligjesh të propozuara dhe miratuara nga kjo qeveri u rrëzuan nga Kushtetuesja, e cila i shpalli ato të papajtueshme me aktin më të lartë juridik të vendit.

Kjo bëri që sullmet ndaj këtij institucioni të marrin trajtë të paprecedentë, duke vënë në dyshim jo vetëm vendimet, por edhe legjitimitetin e saj si institucion i pavarur.

Absurdi i kreut në detyrë të ekzekutivit shkonte deri sa t’i ftonte gjyqtarët e këtij institucioni të garonin në zgjedhje.

“Unë e ftoj Gjykatën Kushtetuese që në zgjedhjet e ardhshme të garojnë edhe ata, le të garojnë në zgjedhje. Nuk është a-politik nëse merr vendime për politikat, për ato garohet në zgjedhje. Kur ata të garojnë ju mund të votoni për ta.”

Në ditën kur do të duhej të festohej pjekuria demokratike dhe përkushtimi ndaj rendit kushtetues, Kurti s’tha fjalë.

Megjithatë, përkundër retorikës së ashpër dhe akuzave të rënda që Kurti dhe kabineti i tij hodhën pa kursim në drejtim të këtij institucioni përgjatë katër viteve, një sondazh i fundit nga UBO pikturoi një goditje fatale ndaj narrativit që Kurti synoi me ngulm të impononte.

Sipas një sondazhi të realizuar nga UBO, kompani në të cilën Vetëvendosje ka besim të madh, plot 79.1% e të anketuarve rezultuan se nuk ndajnë të njëjtin qëndrim me Qeverinë për punën e Gjykatës Kushtetuese.