Albanian
Croatian
English
French
German
Serbian
Turkish
Një çift kosovar ishte gjetur i vrarë në ndërtesën ku jetonte në Epinal të Francës, mëngjesin e së martës. Mediat franceze kishin raportuar se ata janë vrarë me thikë. Trupat e pajetë të tyre i kanë gjetur fëmijët.
Dy ditë pas krimit makabër, mediat franceze kanë raportuar sërish për këtë krim. Sipas Prokurorisë në Francë, burri nga Kosova e ka goditur me thikë gruan e tij duke e lënë të vdekur, e pastaj e ka vrarë edhe veten.
“Nëna ishte vrarë nga bashkëshorti, dhe ky i fundit e kishte përdorur thikën e njëjtë për ta vrarë veten”, ka thënë prokurori Frederic Nahon,.
“Nga autopsia u zbuluan disa plagë me thikë, duke përfshirë edhe plagë në tentim për mbrojtje në trupin e gruas 44-vjeçare. Nga hetimi konfirmohet se mëngjesin e së martës ka ndodhur një zënkë verbale mes prindërve, ku bashkëshorti e kishte akuzuar gruan për tradhti. Skena e krimit ndodhi në banjën e banesës, ku një nga fëmijët pastaj e theu derën dhe i zbuloi trupat e pajetë”, ka thënë tutje Prokurori i rastit.
8 fëmijët e çiftit janë nën kujdesin e shërbimeve sociale.
Familja me origjinë nga Kosova jetonte në Francë që nga viti 2018 dhe kishin statusin e refugjatëve. Tre nga tetë fëmijët ishin të rritur. Shtatë jetonin ende me prindërit e tyre, dhe pesë ishin në shkollë.
Çifti nuk ishte i njohur më herët për problem, ose ndonjë ankesë për dhunë, shtoi tutje prokurori Naohn.
Jozyrtarisht është raportuar se gruaja ka qenë me prejardhje nga qyteti i Vushtrrisë kurse burri nga Dubrava e Istogut.
Çka ndodhi?
Një burrë e një grua me origjinë nga Kosova janë gjetur të vdekur në apartamentin e tyre në qytetin Epinal të Francës. Trupat e tyre janë gjetur me plagë nga një mjet i mprehtë, që dyshohet të jetë thikë, dhe Policia nuk ka përjashtuar asnjë hipotezë për momentin, shkruan France TV Info.
Çifti ishte rreth të dyzetave. Jetonte në apartament me shtatë fëmijët e tyre, nga pesë deri në 21 vjeç.
“Plagë nga therja janë vërejtur në trupin e gruas dhe burrit”, ka konfirmuar prokurori publik i Epinal, Frederic Nahon, në një deklaratë për shtyp të publikuar të mërkurën.
“Fëmijët, njëri katërvjeçar, 13-vjeçar, 16-vjeçar, 19-vjeçar dhe 21-vjeçar u evakuuan nga dritarja e apartamentit nga zjarrfikësit. Dy fëmijët e tjerët ndodheshin në shkollë. Fëmijët e lajmëruan rastin tek autoritetet”, ka shtuar Nahon.
Nahon ka thënë se nuk duhet të përjashtohen asnjë hipotezë, teksa konfirmoi se do të kryhet autopsia, si dhe do të merren dëshmitë e fëmijëve dhe dëshmitarëve të tjerë.
Familja ishte strehuar në Francë që nga viti 2018.