11 korriku si ditë përkujtimi për gjenocidin në Srebrenicë, Qeveria e merr idenë e Enver Hoxhajt që e propozoi 3 muaj më herët

Qeveria e Kosovës do të shqyrtojë sot Propozim-vendimin për shpalljen e datës 11 korrik, si ditë përkujtimi për gjenocidin në Srebrenicë. Në rendin e ditës së publikuar në faqen e Qeverisë, figuron se propozimi është i Zyrës së Kryeministrit.

Por, këtë propozim e kishte dhënë para tre muajsh nënkryetari i Kuvendit dhe deputeti i PDK’së, Enver Hoxhaj.

Në prill të këtij viti, ai kishte njoftuar se kishte propozuar në Kryesinë e Kuvendit që Kuvendi ne ditën kur Asambleja e Përgjithshme e Kombeve të Bashkuara aprovon rezolutën për “Ditën Ndërkombëtare të Kujtimit dhe Përkujtimit të Gjenocidit të vitit 1995 në Srebrenicë”, të njejtën rezolutë ta mbështesë edhe Kuvendi i Kosovës.

“Duke mos qenë anëtare e OKB-së ku do të ishim përkrahës të natyrshëm të kësaj rezolute, kjo është mënyra më e mirë për Kosovën që t’i bashkohet botës demokratike në dënimin dhe përkujtimin e gjenocidit në Srebrenicë.

Ballafaqimi me të kaluarën është më se i nevojshëm dhe politika gjenocidale dhe serbomadhe e Beogradit ndaj Kosovës, Bosnjës dhe Kroacisë, duhet të ndëshkohet dhe përkujtohet, me qëllim që ajo kurrë të mos rikthehet në rajon”, kishte shkruar Hoxhaj.https://www.facebook.com/plugins/post.php?href=https%3A%2F%2Fwww.facebook.com%2Fdr.enverhoxhaj%2Fposts%2Fpfbid0Ys1HnuHnmuADTv7e9tPc1oRDdvyiVoiiRWD1JfDEqrz8nw1d9LTujGSEcDVbjGqDl&show_text=true&width=500

Ndryshe, më 23 maj, Asambleja e Përgjithshme e Kombeve të Bashkuara miratoi rezolutën që e shpall 11 korrikun Ditë Ndërkombëtare të Përkujtimit të Viktimave të Gjenocidit në Srebrenicë.

Forcat serbe në këtë rajon lindor të Bosnje e Hercegovinës vranë mbi 8.000 burra dhe djem boshnjakë në korrik të vitit 1995.

Gjykata Ndërkombëtare e Drejtësisë në Hagë e karakterizoi krimin në Srebrenicë si gjenocid në vitin 2007.