108 vjetori i vrasjes së Isa Boletinit, flet stërnipi i heroit kombëtar

Gazmend Boletini, stërnipi i heroit kombëtar Isa Boletini, në një lidhje direkte në TV Dukagjini për 108 vjetorin e vrasjes së tij, ka thënë se fati i madh është se jeta dhe vepra e heroit është përcjellur nga nipi i tij, Tafil Boletini.

“Fati i madh është se jeta dhe vepra e Isa Boletinit është përcjellur nga nipi i tij, Tafil Boletini…Momenti i vrasjes së Isa Boletinit është përcjellur dhe shkruar nga dokumentet dhe kujtimet e Tafilit, i cili edhe më vonë edhe Institutet e Historisë e kanë profesionalizuar ngjarjen e madhe të vrasjes së tij”, ka thënë stërnipi i heroit, Isa Boletini.

“Sa i përket vrasjes së tij dihet shumë mire që ai është lindue më 17 janar, në tekste mësimore thuhet se ka lindur më 15 janar, por familja e dimë që ka lindur më 17 janar. Në janar ka lindur dhe në janar është vrarë. Dihen rrethanat politike dhe situate politike e Shqipërisë…”, ka thënë Boletini.

Stërnipi i tij ka treguar se heroi Isa Boletini fillimisht ishte tradhëtuar në Shkodër nga ambasada franqeze e asaj kohe.

“E cila kishte pasur një marrëdhënie të mirë, raporte të shkëlqyeshme me Janko Nikotiqin, njëherit ishte edhe kunati i Kranikolës që ishte ministër i Brendshëm i Malit të Zi asaj kohe. Marrëveshja me tradhëti e bindi ‘renopartin’ e Tivarit dhe në momentin kur zbriti në Tivar, Isa me dy djem, nipërit, miqtë nga Radisheva, kushëririn nga Isniqi dhe dhëndri, policia malazeze e shoqërojnë sa më thellë territorit malazez. i vendosin në një shtëpi shqiptare për t’i kontrolluar sa më mirë Isa Boletinin…”, ka rrëfyer ai.

Stërnipi i heroit kombëtar është shprehur i lumtur sepse Isa Boletini ishte përkujtuar sot në të gjitha gazetat shqiptare. “Ne i kemi të gjitha të dokumentuara për vrasjen e tij”, është shprehur ai.

Këtë të martë, janë bërë 108 vjet që nga vrasja e Isa Boletinit.

Heroi kombëtar, Isa Boletini është lindur më 15 janar 1864 në kullën e Boletinëve, afër Mitrovicës. Ai u vra pabesisht nga malazezët në Podgoricë më 23 janar 1916.